Madame og Madame

Eg er på bloggekurs på Berte Kanutte-huset, Høgskulen i Volda.

Eg har berre eitt spørsmål til Høgskulen: Kvifor heng det posar med påskrifta Madame på manne-doen?

Batteri og batteri

I dag gav datamaskina meg melding om at "batteriet i musen er lavt".

Eg tok ut batteria og sjekka, men det var ikkje plass til høgare batteri i musa.

VM-oppsummering

Etter å ha sett nesten ein heil fotballkamp, er det på tide med oppsummering av Fotball-VM 2006.

Årets mest intelligente spelar:
Mensah, Ghana

Årets store spørjeteikn:
Kuffour, Ghana

Årets skodespelar, med eigen pris:
Toni, Italia

Årets stupetrenarar:
Den italienske benken

Årets fram-og-tilbake-spelar
Pimpong, Ghana

Varmt - men ikkje tropenatt

VG-Nett melder at det er varmt i dag, til dei som ikkje har oppdaga det. Men tropenatt har det ikkje vore:
"Tross godværet har det hittil i sommer ikke vært tropenetter. Varmest natt til mandag var det i Bergen, med laveste 16,1 grader på det varmeste."

Ein må kunne kalle vêret relativt stabilt når det lågaste også er det varmaste, eller kanskje det berre var journalisten som blei litt heit i toppen.

VM-tøys

Arne Scheie kjem merkeleg nok med ei Quiz-bok om fotball-VM i desse dagar. Samtidig finn NTB ut at dei vil intervjue denne fotballfriken. Resultatet av dette er at Arne Scheie mellom anna seier at ein av hans favorittkampar er då Noreg spelte mot USA i VM i 1994, i USA. Han seier også at denne opningskampen Noreg mot USA er eit bevis på at fotballinteressa er stor, då meir enn 15 000 nordmenn hadde billett til kampen.

Tenkjer det var ein svindlar på svartebørsen som gjorde gode pengar på "godt orienterte" fotballinteresserte nordmenn på tur! For NTB sine journalistar er jo til å lite på...

Om å overleve seg sjølv

Programposten "Typisk norsk" har meir enn ni liv, i følgje TV-programmet i Sunnmørsposten tysdag 9. mai. Der står det at NRK2 sender "Typisk norsk" episode nr. 10 av 8.

Som alle store artistar, har også Typisk norsk-redaksjonen øvd inn ekstranummer.

Fjell og fjell

Trønderen Elise Båtnes er 1. konsertmester i det danske Radiosymfoniorkesteret. Heilt uforvarande gir ho ny innsikt i gamle Ivar si dikting i ein kommentar til Berlingske Tidende: "Mangelen på fjelde er et problem ved at være i Danmark, så jeg forsøger å bo både her og i Oslo."
Så det var altså Tryvvanshøgda og Grefsenkollen som var Dei gamle fjell i syningom.

Hyllevare

Fylkesordførar i Møre og Romsdal, Jon Aasen, snakka om bruken av mobile gasskraftverk på NRK. Desse kraftverka er litt enklare å flytte på enn til dømes Altakraftverket, i og med at dei blir levert på store trailerar. Aasen sa til NRK at slike er "hyllevare nede i Europa".

Relativt vaksne hyller!